UHI agus Club Buill-choise Shiorrachd Narann a’ tòiseachadh com-pàirteachas gus cur ri cothroman oileanaich san àm ri teachd
Tha com-pàirteachas ùr eadar Oilthigh na Gàidhealtachd agus nan Eilean (UHI) agus Club Buill-choise Shiorrachd Narann a’ fosgladh chothroman togarrach do dh’oileanaich a bhith a’ cosnadh gnàth-eòlas, a’ leasachadh nan sgilean aca, agus a’ toirt fìor bhuaidh air a’ choimhearsnachd ionadail.
Tron cho-obrachadh seo, bidh e comasach do dh’oileanaich UHI obair shaor-thoileach a dhèanamh ann am farsaingeachd de dhreuchdan sa chlub coimhearsnachd seo an Lìog na Gàidhealtachd – agus iad a’ cosnadh gnàth-eòlas a chuireas ri an cuid ionnsachaidh agus a leasaicheas na cothroman dreuchdail aca.
Thuirt Kevin Reid, Cathraiche Chlub Buill-choise Shiorrachd Narann:
“Tha sinn anabarrach toilichte fàilte a chur air oileanaich UHI gu Club Buill-choise Shiorrachd Narann. Tha com-pàirteachasan ionadail air leth cudromach dhuinn. ’S e àm beothail a tha seo don chlub, agus tha sinn an dòchas gnàth-eòlas luachmhor a thoirt do dh’oileanaich ann an àrainneachd buill-choise.”
Jane Steele, UHI; Kevin Reid, Cathraiche Chlub Buill-choise Shiorrachd Inbhir Narann; agus an t-Àrd-Ollamh Keith Smyth bho UHI. Creideas an dealbha: Paul Caimbeul agus UHI.
Thuirt an t-Àrd-Ollamh Keith Smyth, Deadhan Ionnsachaidh, Teagaisg agus Oileanaich:
“Tha sinn an-còmhnaidh a’ rùrach dhòighean air ionnsachadh a cheangal ri buaidh a-muigh san t-saoghal mhòr. Tha an co-obrachadh seo le Club Buill-choise Shiorrachd Narann na chothrom foirfe do na h-oileanaich againn a bhith a’ toirt fàs air sgilean practaigeach, a’ cur ris a’ choimhearsnachd aca, agus a’ leasachadh nan cothroman dreuchdail a bhios aca san àm ri teachd.”
Bidh cothrom aig oileanaich a bhith an sàs ann an raointean leithid:
- Naidheachdas – aithris air làithean-gheamannan agus an club fhèin
- Togail dhealbhan
- Margaidheachd didseatach, conaltradh agus follaiseachd
- Dealbhadh na làraich-lìn
- Riaghladh thachartasan
- Cumail suas an raoin agus nan goireasan
- Trèanadh spòrs
- Leigheas leòntan spòrs
- Agus raointean eile far am bi comas aig oileanaich cuideachadh leis na sgilean no na h-ùidhean aca
Tha an iomairt seo, fo stiùir ionad dhreuchdan is so-fhastachd UHI Futures , a’ tabhann chothroman sùbailte air obair shaor-thoileach a tha air an dealbhadh a bhith freagarrach a rèir uallaichean ionnsachaidh, agus i a’ toirt cothrom do dh’oileanaich fàs a thoirt air an CB, an sgilean obair-sgioba is conaltraidh a neartachadh, lìonraidhean proifeiseanta a leudachadh, agus a bhith a’ faireachdainn mar phàirt den choimhearsnachd ionadail.
Ged a thèid fàilte a chur air eòlas no ùidh ann am ball-coise, chan eil sin riatanach – tha an com-pàirteachas fosgailte do gach oileanach air feadh chom-pàirteachas UHI a tha airson gnàth-eòlas luachmhor a chosnadh a-muigh san t-saoghal mhòr ann an àrainneachd thaiceil, fo stiùir na coimhearsnachd.
Faodaidh oileanaich UHI aig a bheil ùidh pàirt a ghabhail post-d a chur gu futures@uhi.ac.uk